Norðurbær – Suðurbær, mótsnefnd!

Sigurður Jóhannsson (Jóhanns Guðbrandssonar)

Það er óhætt að segja að nefnd þessi sé hokin af reynslu og telst því mikill hvalreki á fjörur okkar Reynismanna.

Bubbi í Holti var á árunum 1994-1998 sérlegur ráðgjafi Roy Evans hjá Liverpool og uppgötvaði meðal annars Björn Tore Kvarme. Flestir muna einnig eftir því þegar Bubbi slóst við Stan Collymore eftir æfingu í nóvember 1996 og afleiðingarnar urðu þær að Collymore missti af landsleik Englendinga og Makedóna síðar í þeim sama mánuði. Að auki hefur Bubbi komið að ýmsu sjálfboðaliðastarfi fyrir knattspyrnudeild Reynis í gegnum árin og verið einn dyggasti stuðningsmaður sem fyrirfinnst á Miðtúni og þó víðar væri leitað.

Kalli Ott hefur undanfarin 20 ár ferðast um heiminn og tekið að sér sérstök þróunarverkefni fyrir Leikklukkuframleiðendur. Hann þykir einn helsti sérfræðingur á þessu sviði í heiminum í dag og skemmst er að minnast þess þegar forsvarsmenn Superbowl í NFL deildinni bandarísku leituðu til Kalla fyrir úrslitaleikinn árið 2008 sem fram fór í Phoenix, Arizona. Að auki hefur Kalli komið að dómgæslu- og öðrum sjálfboðaliðastörfum fyrir knattspyrnudeild Reynis í gegnum árin og ávallt skilað starfi sínu með sóma.

Sigga Jóa Brands þarf vart að kynna. Saga hans er samofin sögu Reynisfélagsins og saga sú hefur oft á tíðum verið reyfarakennd og er efni í heilan bókaflokk. Hann þótti einn efnilegasti markvörður Miðneshrepps á sínum tíma. Árið 1972 yfirgaf hann heimahagana til að takast á við harðan heim atvinnumennskunnar í knattspyrnu. Spilaði lengstum í 2. Deildinni færeysku með FC Hoyvík og er í 9 sæti yfir leikjahæstu menn félagsins frá upphafi. Hrökklaðist skyndilega frá Færeyjum árið 1976 eftir að hafa lent upp á kant við formann félagsins sem vildi ekki leysa hann undan samningi þegar tilboð barst frá 1. Deildarliðinu B36. Hefur unnið gríðarmikið og öflugt starf fyrir ksd. Reynis sem ekki sér fyrir endann á.

Með kveðju,
Undirbúningsnefndin