Hafsteinn Helgason til liðs við Norðurbæ/Suðurbæ fyrir metfé?

Fifa-dómarar þegar stórveldin mætast
14.08.2017
Gissurarson og Farber á milli stanganna
23.08.2017
Sýna allt

Hafsteinn Helgason til liðs við Norðurbæ/Suðurbæ fyrir metfé?

“Það verður ekkert sparað og allt lagt í sölurnar” segja forráðamenn liða Norðurbæjar og Suðurbæjar en liðin mætast í stóruppgjöri á Sandgerðisvellinum nk föstudag.

Liðin hafa verið að styrkja sig í félagsskiptaglugganum og berast nú fréttir af því að allt stefni í að reynsluboltinn Hafsteinn Rúnar Helgason sé við það að hafa félagsskipti og er hann á leið í læknisskoðun í þessum skrifuðu orðum.

Reyndu bæði Norðurbær og Suðurbær að fá leikmanninn knáa til liðs við sig fyrir komandi átök og hafa liðin yfirboðið hvort annað í allt sumar.

Engar smáupphæðir nefndar í þeim efnum og eftir situr leikmannamarkaðurinn „algjörlega galinn“ eins og einn framkvæmdastjóri í ensku deildinni orðaði það á dögunum en boltinn rúllaði af stað og í framhaldinu þótti stórlið PSG heppið að ná Neymari fyrir ekki meiri upphæð en raun varð.

Þess má geta að hvorki Norðurbær né Suðurbær buðu í Neymar þar sem liðin hafa hvorugt not fyrir leikmanninn en  bæði liði þykja hafa á mjög öflugum framherjum að skipa í dag.

Ljóst þykir að liðin ætla sér stóra hluti í komandi móti og kemur ekkert annað en sigur til greina.

Endanlegt kaupverð er ekki gefið upp og fór svo að liðin sættust á skiptan hlut og mun Hafsteinn því spila sitthvorn hálfleikinn með liðunum á föstudaginn.

Þar sem viðburðurinn á 10 ára afmæli um þessar mundir mun mótsnefnd ekkert aðhafast í málinu.

Búist er við því að Hafsteinn fái leikheimild áður en glugginn lokar á fimmtudag.