Myndasafn frá síðasta móti komnar inn
06.10.2025
Þorvaldur Árna og Arnar Þór verða dómarar
17.08.2026
Tíminn líður hratt á gervihnattaöld og allt það.
Það er komið að skemmtilegasta fótboltamóti norðan Alpafjalla, Norðurbær vs Suðurbær, og ekki seinna vænna en að setja í gang og opna fyrir skráningu.
Suðurbær á harma að hefna eftir síðasta mót en eins og allir vita þá kom Norðurbær nokkuð á óvart á síðasta ári og sigraði sigurstrangt lið Suðurbæjar.
Kominn tími til sögðu einhverjir og aðrir gárungar héldu því fram að ef Norðurbær hefði ekki unnið í þessari lotu þá hefði mótið að öllum líkindum verið lagt af og ekki var það svo að Suðurbær hafi leyft Norðurbæ að vinna heldur þvert á móti gáfu þau allt í þetta en urðu að játa sig sigraða að lokum.
Norðurbær átti einfaldlega einn allra stærsta félagskiptaglugga sem sögur fara af. Fóru hamförum á markaðnum og sópuðu til sín lykilleikmönnum í allar stöður. Greinilega miklir peningar í umferð á þeim bænum.
Mátti greinilega sjá á spilamennsku liðsins hvað stífar æfingar mánuðina fyrir mótið skiluðu sér alla leið. Liðið í hörku formi og gáfu Norðurbæjarstelpurnar strax tóninn með stórsigri í fyrsta leik.
Tapið lagðist ekki vel í Suðurbæ og hófst undirbúningur strax á vetrarmánuðum. Sást til leikmanna m.a. taka á því í þreksal bæjarins ásamt því að æfa 100 mtr sprettsund, hvað svo sem það nú er. Stífar æfingar, töflufundir og videókvöld þar sem rýnt var í stórmyndina The Mighty Ducks ítrekað í hverri viku eru hlutir sem eiga tvímælalaust eftir að skila sér á vellinum í komandi móti.
“Liðið er komið í ofþjálfun” voru fyrirsagnir sem mátti lesa í staðarblöðunum þegar leið á sumarið. Leikmönnum var þá gefið stutt sumarfrí en gert að melda sig inn og skrá sig um leið og opnar fyrir skráningu og loka þannig félagskiptaglugganum á Norðrið.
Þá hefur Þórði Ólafssyni vítakóngi, sem hélt uppi heiðri Suðurbæjar með öruggum sigri í síðasta móti, snúist hugur en hann íhugaði að hætta á toppnum þar sem hann fékk gylliboð um einkaþotu og barónahöll við hæfi í Kólumbíu. Kenna átti hann mönnum þar á bæ að skora úr vítum ásamt því að setja upp umboðsskrifstofur í Þýskalandi og Hollandi en fulltrúar allra þessara þjóða höfðu strax samband við Dodda eftir HM í Bandaríkjunum þar sem þær áttu það allar sameiginlegt að detta út í vítakeppni. Við fögnum því að Doddi valdi að heiðra áfram mótið með nærveru sinni.
En að öllu gamni slepptu þá tekur alvaran við þann 28. ágúst þar sem liðin Norðurbær og Suðurbær leiða saman hesta sína enn eina ferðina í leikgleði, veislu og skemmtun langt fram á kvöld að vanda.
Dagskrá verður nánar auglýst á næstunni