Norðurbær fór með sigur af hólmi

Föstudaginn 29 ágúst 2025 fór fram, í sextánda sinn, knattspyrnukeppnin milli Norður- og Suðurbæjar.

Keppendur voru alls 67 af öllum stærðum og gerðum.

Veðrið hefur líklegast aldrei verið betra og keppendur nýttu sér aðstæður til hins ítrasta og sýndu sannkallaða SAMBA-takta á iðagrænum Reynisvellinum.

Staðan fyrir þetta mót var 9-6 fyrir Suðurbæ og þegar búið var að stilla upp liðum fyrir keppnina var ljóst að Suðurbær var mun líklegra til að halda sigurgöngu sinni áfram, lið þeirra taldist mun sterkara á hinum svokölluðu pappírum.

Líkt og árið áður voru fyrirliðar og jafnframt elstu þáttakendur hvors bæjarhluta þeir Óskar Gunnarsson fyrir Suðurbæ og Jónas Þórhallsson fyrir Norðurbæ. Leiddu þeir lið sín inn á völlinn við tóna Jóa Útherja og UEFA Champions League Anthem líkt og hefð hefur skapast fyrir.
Dómarar ársins voru þeir Þorvaldur Árnason og Pétur Guðmundsson.

Vítaspyrnukeppnin var sú fjölmennasta frá upphafi. Markmennirnir fóru á kostum í keppninni og duttu keppendur út hraðar en þeim hafði órað fyrir. Eftir stóðu þá tveir keppendur í bráðabana, fóstbræðurnir Pétur Brynjarsson og Þórður Ólafsson. Fór svo að lokum að Doddi (Þórður Ólafsson) stóð uppi sem sigurvegari og steig hann trylltan sigurdans þegar úrslitin lágu fyrir.

Þá hófust knattspyrnuleikirnir. Fyrst léku dömurnar, svokallaðar Hryssur. Þar gerði Norðurbæjarliðið sér lítið fyrir og rótburstaði Suðurbæ með sex mörkum gegn tveimur.

Þá léku karlaliðin samtímis. Í yngri flokki, svokallaðra Fola, fór fram hörkuleikur og mátti vart á milli sjá hvort liðið færi með sigur af hólmi. Norðurbæingar reyndust sterkari á lokasprettinum og sigldu sigri heim með fimm mörkum gegn fjórum. Í eldri flokki, svokallaðra Gæðinga, fór fram gríðarlega tvísýnn leikur. Fyrstu mínúturnar voru alfarið eign Suðurbæjarliðsins og gerði það orrahríð að marki Norðurbæinga án þess að koma boltanum í netið. Smám saman jafnaðist þó leikurinn og Norðurbæingar komust betur inn í leikinn þegar á leið. Eftir ótrúlegar lokamínútur stóð Norðurbæjarliðið uppi sem sigurvegar, skoruðu tvö mörk gegn einu. Það var því ljóst að Norðurbær hafði loksins tekist að sigra keppnina eftir langa þrautagöngu.

Fyrirliði Norðurbæjar, Jónas Þórhallsson, tók svo á móti hinum glæsilega farandbikar í 90 ára afmælisveislu Knattspyrnufélagsins Reynis sem fram fór í Samkomuhúsinu síðar um kvöldið.
Mikill var fögnuður Norðurbæjarliðsins og var fagnað langt fram á morgun. Svo mikill var fögnuðurinn að mitt í öllum látunum hvarf farandbikarinn en sem betur fer fannst hann í heimahúsi nú í vikunni og hafði farið vel um hann allan tímann.

Óskar Gunnarsson var heiðraður fyrir þátttöku sína sem elsti leikmaðurinn.