Nú er hugur kominn í þessi gömlu hverfalið sem margir minnast með gleði í hjarta og á Sandgerðisdögum verður blásið til leika á ný.
Um er að ræða hörkukeppni á milli hverfanna sem fram fer laugardaginn 30. ágúst kl.15 á Sparisjóðsvellinum. Leikið verður á 1/2 velli í 7 manna liðum. Menn 30 ára og eldri eru hvattir til þess að taka fram skóna, stilla saman strengi, hvetja hvern annan til þátttöku og skrá sig til keppni.
Enginn er í vafa um að hér er á ferðinni frábær skemmtun og stór liður í því að brottfluttir Sandgerðingar hitti gamla félaga og eigi með þeim góðar stundir.
Norðurbæjarmenn eru beðnir um að skrá þátttöku sína hjá Jónasi Þórhallssyni í síma 691-4030 eða á netfangið jonas@thorfish.is og Suðurbæjarmenn hjá Jóni Bjarna í síma 896-1795 eða á netfangið jonjulia@hive.is.
Skráningargjald er kr.1000 og greiðist á mótsstað. Innifalið í verði er sérmerkt fótboltatreyja til eignar.
Einnig er hægt að skrá sig á netfangið sandgerdisdagar@sandgerdi.is og í síma 899-6397.
Við minnum brottflutta Sandgerðinga á tjaldsvæðið sem staðsett er á Gamla malarvellinum og götugrillin sem eru að kvöldi laugardags.
Með von um að sjá sem flesta á Sandgerðisdögum 2008.
